पर्सा क्षेत्र नम्बर १ मा पछिल्लो समय देखिएको निषेधको राजनीति लोकतान्त्रिक मूल्य–मान्यताविपरीत भएको सरोकारवालाहरूले बताएका छन्।

विशेषगरी नेकपा एमालेका नेता प्रदीप यादवप्रति लक्षित गरी देखिएको विरोध र निषेधले स्वस्थ राजनीतिक संस्कार कमजोर बनाउँदै लगेको उनीहरूको भनाइ छ।

राजनीतिमा असहमति हुनु स्वाभाविक भए पनि व्यक्तिविशेषलाई निशाना बनाएर निषेध गर्ने प्रवृत्तिले समाजमा द्वन्द्व र विभाजन बढाउने स्थानीय बुद्धिजीवीहरूको चिन्ता छ।

उनीहरूका अनुसार बहस, आलोचना र प्रतिस्पर्धा लोकतन्त्रको आधार हुन्, तर निषेध र बहिष्कारले समाधान होइन, समस्या मात्र जन्माउँछ।

प्रदीप यादव लामो समयदेखि पर्साको राजनीतिमा सक्रिय रहँदै आएका नेता हुन्।

उनका काम, विचार र राजनीतिक धारणा मन नपर्न सक्ने भए पनि त्यसको जवाफ लोकतान्त्रिक तरिकाबाट दिनुपर्ने सरोकारवालाहरूको धारणा छ।

“राजनीति निषेधको होइन, विचारको प्रतिस्पर्धा हो,” एक स्थानीय नागरिकले बताए।

राजनीतिक विश्लेषकहरूका अनुसार निषेधको राजनीति सुरु हुँदा त्यसको असर केवल एक व्यक्तिमा सीमित हुँदैन, यसले समग्र समाज र लोकतान्त्रिक अभ्यासलाई नै कमजोर बनाउँछ।

यसले मतदातालाई सही विकल्प छनोट गर्नबाट समेत वञ्चित गराउने खतरा रहेको उनीहरूको भनाइ छ।

युवा वर्गले समेत सामाजिक सञ्जालमार्फत निषेधको राजनीतिविरुद्ध आवाज उठाइरहेका छन्। उनीहरू स्वस्थ बहस, नीतिगत आलोचना र विकासका मुद्दामा केन्द्रित राजनीति आवश्यक भएको बताउँछन्।

पर्सामा विकास, रोजगारी, शिक्षा र स्वास्थ्यजस्ता महत्वपूर्ण मुद्दा ओझेलमा परिरहेको बेला निषेध र विरोधको राजनीति हावी हुनु दुर्भाग्यपूर्ण भएको आम बुझाई छ।

यस्तो प्रवृत्तिले कसैको भलो नगर्ने भन्दै युवा जेनजी सबै राजनीतिक दल र नेताहरूलाई संयमित र जिम्मेवार बन्न आग्रह छ।

अन्ततः लोकतन्त्र बलियो बनाउन सहिष्णुता, संवाद र विचारको सम्मान आवश्यक छ।

निषेधको राजनीति त्यागेर सकारात्मक बहसमा अघि बढ्नु नै पर्साको हितमा हुने सरोकारवालाहरूको निष्कर्ष छ।