वीरगञ्ज । पर्सा प्रहरीले ठूलो परिमाणमा लागूऔषध गाँजासहित पिकअप चालकलाई नियन्त्रणमा लिएको छ ।

पक्राउ पर्नेमा रामेछाप जिल्लाको खाडादेवी गाउँपालिका–१ निवासी २८ वर्षीय सुबराज श्रेष्ठ रहेका छन ।

जिल्ला प्रहरी कार्यालय पर्साले पत्रकार सम्मेलनको आयोजना गरी वीरगञ्ज–१७ कोनिया क्षेत्रमा १७६ केजी लागू औषध गाँजा बरामद गरिएको जनाएको छ।

विशेष सूचनाको आधारमा प्रहरी चौकी सिर्सियाबाट खटिएको प्रहरी टोलीले सोमबार साँझ करिब ८ बजे कोनियास्थित सामुदायिक अस्पताल अलौबाट कोनिया जाने ग्राभेल सडकखण्डमा बा. २१ च ७८५५ नम्बरको पिकअप गाडीलाई रोकी चेकजाँच गरेको थियो ।

चेकजाँचका क्रममा गाडीको पछाडिपट्टि प्लास्टिकका बोरामा परालले छोपी लुकाई छिपाइ राखिएको अवस्थामा १२ पोकामा रहेको १७६ केजी लागूऔषध गाँजा जस्तो देखिने पदार्थ फेला परेको प्रहरीले जनाएको छ । 

बरामद गरिएको लागूऔषध, पिकअप गाडी तथा पक्राउ परेका व्यक्तिलाई आवश्यक कानुनी कारबाहीका लागि नियन्त्रणमा राखी थप अनुसन्धान भइरहेको प्रहरीले जनाएको छ ।