सोसल मिडिया
हाम्रो बारेमा
सिरहा । खानेपानीमन्त्री प्रदीप यादवले धनगढीमाई नगरपालिका सहित देशभरीका नागरिकलाई सुरक्षित एवं शुद्ध खानेपानीको अभावबाट मुक्त गराउन थालिएको बताउनु भएको छ ।
आज सिरहाको धनगढीमाई नगरपालिका स्थित डावरटोल–नैनपुरटोल खानेपानी आयोजनाको उद्घाटन गर्नु हुँदै मन्त्री यादवले धनगढीमाई नगरपालिका सहित देशभरका नागरिकलाई सुरक्षित र शुद्ध खानेपानीको अभावबाट मुक्त गरिएको बताउनुभयो ।
उहाँले भन्नुभयो, “खानेपानीको अभाव अब विगतको कुरा हुन लागेको छ । हामीले दूषित पानीका कारण फैलिने रोगबाट नागरिकलाई जोगाउन सक्ने व्यवस्था गरि सुरक्षित एवं शुद्ध खानेपानीको व्यवस्था गरेकाछौँ ।”
सम्बोधनकै क्रममा मन्त्री यादवले आधुनिक प्रविधिमार्फत देशभर खानेपानी सेवा सुधार हुँदै गएको र ग्रामीण क्षेत्रका बाँकी केही समस्याहरू समाधान गर्ने प्रक्रिया पनि तीव्रगतिमा अघि बढाइएको जिकिर गर्नुभयो ।
उहाँले भन्नुभयो, “हामीले आजदेखि धनगढीमाई नगरपालिका वडा नं ११, १२ र १३ का हजारौँ नागरिकलाई सुरक्षित एवं शुद्ध खानेपानीको अभावबाट मुक्त गराएका छौँ । यो सरकारको नागरिकप्रतिको प्रतिबद्धताको उदाहरण पनि हो ।”
यसैगरी मन्त्री यादवले धनगढीमाईका हजारौँ नागरिकलाई सुरक्षित एवं शुद्ध खानेपानीको अभावबाट मुक्ति दिलाउनुका साथै उनीहरुको खानेपानीसम्बन्धीको समस्या समाधान भएको जानकारी दिनुभयो ।
स्थानीय तहसँगको सहकार्यद्वारा देशभरका नागरिकलाई सुरक्षित तथा पर्याप्त खानेपानी पुर्याउने सरकारको प्रतिबद्धता रहेको समेत मन्त्री यादवले स्मरण गराउनुभयो ।
उहाँले भन्नुभयो, “अब नागरिकलाई शुद्ध, सुरक्षित र नियमित पानी आपूर्ति हुने विश्वास दिलाउँछु ।”
यसैगरी मन्त्री यादवले यो आयोजना मार्फत नगरवासीलाई घरदैलोमै स्वच्छ, सुरक्षित र पर्याप्त मात्रामा खानेपानी पुर्याइ यहाँका स्थानीयवासीको स्वास्थ्य, सरसफाइ र जीवनस्तरमा समेत उल्लेखनीय सुधार ल्याउने विश्वास व्यक्त गर्नुभयो ।
आयोजनालाई प्रभावकारीरूपमा कार्यान्वयन गर्न स्थानीय सरकार, प्राविधिक समूह र जनसहभागिताको ठूलो भूमिका रहेको उल्लेख गर्नु हुँदै मन्त्री यादवले प्रशङ्सा समेत गर्नुभयो ।
उहाँले यस्ता आयोजनाले समावेशी विकासलाई तीव्रता दिने उल्लेख गर्दै अन्य वडाहरूमा पनि क्रमश: यस्ता योजना विस्तार गरिने प्रतिबद्धता जनाउनुभयो ।
“नागरिकहरूको सक्रिय सहभागिता र जनश्रमदान बिना कुनै पनि योजना सफल हुन सक्दैन, र यस आयोजना प्रति देखिएको जनताको विश्वास र सहयोगप्रति म हार्दिक कृतज्ञता व्यक्त गर्दछु,” उहाँले भन्नुभयो ।
खानेपानी सचिव ईञ्जिनियर प्रमिलादेबी शाक्य बज्राचार्यले मन्त्रालयको नीति तथा योजनाले नागरिकको हित र समुन्नतीलाई केन्द्रबिन्दुमा राखि सुरक्षित, भरपर्दो र दिगो खानेपानी सेवा प्रवाह सुनिश्चित गर्ने प्रमुख लक्ष्य रहदै आएको बताउनुभयो ।
यसैगरी खानेपानी तथा ढल व्यवस्थापन विभागका महानिर्देशक ईञ्जिनियर रामुकमार श्रेष्ठले खानोपानी विभागले मानव विकास सुचाङ्क कम भएका स्थानमा प्राथमिकताका साथ खानेपानी योजना कार्यन्वयन गरिरहेको र तराई मधेशका २८० वटा अधुरो योजनाहरु सञ्चालन गर्न नीतिगत सुधार गरि कार्यन्वयन गर्ने तयारीमा रहेको जानकारी दिनुभयो ।
उहाँले भन्नुभयो, “विभागले खानेपानी योजनाहरु जलवायु परिवर्तन उत्थानशिल हुने गरी निर्माण गर्ने र दीगो रुपमा सञ्चालन गर्ने व्यवस्था गरिरहेकोे छ । यस डाबरटोल नरैनपुर खानेपानी योजनाले धनगढीमाईवासीको जीवनस्तर सुधार्न महत्वपुर्ण भुमिका खेल्नेछ भन्ने विश्वास लिएकाछौँ ।”
मधेस प्रदेशका स्वास्थ्य तथा जनसङ्ख्यामन्त्री सत्रुधनप्रसाद सिंह तथा धनगढीमाई नगरपालिकाका नगरप्रमुख शिवशङ्कर महतोले धनगढीमाई नगरपालिकाको वडा नं ११,१२ र १३ निर्माण सम्पन्न भएको डावरटोल–नैनपुरटोल खानेपानी आयोजनाले यहाँका नागरिकहरुको पानीको समस्या दीर्घकालिन रुपमा समाधान गरेको भन्दै खुशी व्यक्त गर्नुभएको थियो ।
रु १० करोड ९४ लाख लागतमा पाँच वर्षपछि निर्माण सम्पन्न भएको उक्त आयोजनाबाट वडा नं ११, १२ र १३ का कम्तिमा पनि एक हजार ५०० घरधुरीका आठ हजार छ सय जना लाभान्वित हुनेलाभान्वित हुने संघीय खानेपानी तथा ढल व्यवस्थापन आयोजना, जनकपुरका आयोजना प्रमुख हरिप्रसाद शर्माले जानकारी दिनुभयो ।
उक्त कार्यक्रममा स्थानीयवासी,जनप्रतिनिधि, कर्मचारी लगायत हजारौँको सहभागीता रहेको थियो ।
