पर्सामा निषेधाज्ञा हट्यो, बजार साँझ ६ बजे सम्म खोल्न पाईने

वीरगञ्ज १५ असोज । साउन १० गतेदेखि पर्सा जिल्लाको सदरमुकाम वीरगञ्जमा लगातार जारी रहेको निषेधाज्ञा अन्त्य भएको छ ।

बुधबार पर्साका प्रमुख जिल्ला अधिकारी अस्मना तामाङको अध्यक्षतामा बसेको जिल्ला सुरक्षा समितिको बैठकले वीरगञ्जमा विगत ६८ दिनदेखि लागेको निषेधाज्ञालाई पूर्ण रुपले हटाउने निर्णय गरेको छ ।

विगत केहि दिनदेखि निषेधाज्ञालाई खुकुलो गरिएपनि प्रशासनले पूर्ण रुपमा निषेधाज्ञालाई अन्त्य भने गरेको थिएन ।

प्रशासनले बिहिबार एउटा सूचना जारी गर्दै वीरगञ्जको मुख्य बजारमा सञ्चालित पसलहरु अब साँझ ६ बजेसम्म खुल्ने छन् । यसअघि बिहान ११ बजेदेखि ५ बजेसम्म मात्र पसल सञ्चालन गर्ने अनुमति दिइएको थियो । प्रशासनले दिएको जानकारी अनुसार अब शनिबारपनि वीरगञ्ज बजार खुल्ने छ ।

फलफुल र तरकारी बजारको हकमा भने पुरानै नियम कायम रहेको छ । फलफुल र तरकारी व्यवसायीहरुले प्रशासनले तोकेको स्थानमा बिहान ५ बजेदेखि ८ बजेसम्म मात्र व्यवसाय सञ्चालन गर्न पाउने सूचनामा उल्लेख गरिएको छ । सडक पेटी र फुटपाथमा भने कुनै किसिमको पसल सञ्चालन गर्न भने पाउने छैन ।

त्यसैगरी सदरमुकाम वीरगञ्जमा रहेका सरकारी कार्यालयहरुबाट प्रवाह हुने सेवाहरु अब स्थानीय तहका बासिन्दा अनुसार दिइने छ । वीरगञ्ज महानगरपालिकाका बासिन्दाहरुका लागि सरकारी कार्यालयहरुले आइतबार र सोमबार सेवा प्रवाह गर्नेछन भने पोखरिया, पर्सागढी र बहुदरमाई नगरपालिकाका बासिन्दाहरुकाले मंगलबार र बुधबार सेवा लिन सक्ने छन् ।

यस्तै जिल्लाका अन्य पालिकाहरुका बासिन्दाहरुले बिहीबार र शुक्रबार सेवा प्राप्त गर्ने जिल्ला प्रशासन कार्यालयका प्रशासकीय अधिकृत विनय कुमार श्रीवास्तवले बताए । उनले आवश्यकताको आधारमा सरकारी कार्यालयहरुले सेवाको मोडालिटी परिवर्तनपनि गर्न सक्ने जानकारी दिए ।

कोभिड-१९ को जोखिम कायमै रहेको बेला नेपालीहरुको महान पर्व वडा दशैं, तिहार र छठ पूजा नजिक आईरहेको कारण सबैलाई आ-आफ्नो स्थानमा रहेर पूजा, अर्चनागरी चाडपर्व मनाउन र सार्वजनिक स्थल तथा बजारमा अनावश्यक भिडभाड नगर्न प्रशासनले अनुरोध समेत गरेको छ ।

 

 

error: Content is protected !!