वीरगञ्ज, २८ अषाढ । वन तथा वातावरण मन्त्री प्रदीप यादवले शिक्षाको सुधारका लागि शिक्षा मन्त्रीसहितका अन्य सम्बन्धीत निकायबाट हुने कामका लागि सदैव तयार रहेको बताए ।
वीरगञ्ज महानगरपालिकाले त्रिजुद्ध माविमा मंगलवार आयोजना गरेको प्रधानाध्यापकसँगको अन्तरक्रिया कार्यक्रमलाई सम्बोधन गर्दै मन्त्री यादवले वीरगञ्जका सामुदायिक विद्यलयको शैक्षिक गुणस्तर बृद्धिका लागि सबैलाई हातेमालो गर्नुपर्नेमा जोड दिए ।
सामुदायिक विद्यालयभित्रै पनि विभेद यथावत रहेको हुँदा निजी र सामुदायिक बिचको खाडललाई पुर्न चुनौतिपुर्ण रहेको मन्त्री यादवको भनाई छ । सामुदायिक विद्यालयभित्रै शूल्क तिर्नेले अंग्रेजी माध्यम पढ्न पाउने र नतिर्नेले नेपाली माध्यम पढ्नुले शिक्षामै बिभेदीकरण देखिएको बताउँदै मन्त्री यादवले विभेदका बिच गुणस्तर र समानताको पाठ सिक्न नसकिने बताए ।
शिक्षाबिना बिकास असम्भव हुने तर्क गर्दै उनले विद्यालयको स्थलगत अवलोकन गरेर आवश्यक्ताअनुसारका योजना निर्माण गर्ने र ति योजनालाई महानगरले कार्यन्वयन गर्नुपर्ने बताए ।
वीरगञ्जमा भ्रमणका लागि आउनेहरुले अनिवार्य रुपमा विद्यालयको अवलोकन गर्ने खालको नमुना विद्यालय बनाउनका लागि हरसम्भव तयार रहेको मन्त्री यादवको भनाई छ । आफुले झगडा गरेर वा लडेर भएपनि शिक्षा मन्त्रालय तथा अन्य सम्बन्धीत निकायबाट काम गराउने आश्वासन पनि उनले दिएका छन् ।
कार्यक्रममा सहभागी सामुदायिक विद्यालयका प्रधानाध्यापकहरुले पनि विद्यालयका समस्याहरु सुनाएका थिए । शिक्षक सरुवाले पठनपाठनमा पार्ने प्रभावसँगै दरबन्दीअनुसारको शिक्षक अभावका कारण एउटै शिक्षकले २र३ वटा विषय अध्यापन गराउनुपर्ने बाध्यता रहेको प्रधानाध्यापकहरुको भनाई थियो ।
विद्यालयमा पर्याप्त मात्रामा भौतिक पूर्वाधार नहुँदा समस्या भइरहेको उनीहरुले बताएका थिए । कतै विद्यार्थी संख्या कम तर शिक्षक संख्या धेरै र कतै शिक्षक कम र विद्यार्थी धेरै भएको हुँदा समायोजन गर्नुपर्ने उनीहरुले बताए ।
विद्यालयमा हुने राजनीतिदेखि विद्यालय व्यवस्थापन समिति गठन गर्दा आउने समस्याहरुको सम्बोधन गर्नुपर्नेमा अभिभावकहरुले जोड दिएका थिए ।
कार्यक्रममा वीरगञ्ज महानगरपालिकाका प्रमुख राजेशमान सिंह, वीरगञ्ज महानगरपालिकाका निमित्त प्रमुख प्रशासकिय अधिकृत एवम् शैक्षिक प्रशासन महाशाखा प्रमुख अर्विन्दलाल कर्ण लगायतको उल्लेख्य उपस्थिती रहेको थियो ।
